ياويل قلبي كل مااشتقت لقياه..
وشلون ماتشتاق عيني لعينه!!
انا ادري إني حيل احبه واهواه..
وانا ادري إن القلب صار بيدينه!
اموت انا في غيابه واحياه..
وشلون اجل لوصافحتني يمينه!
حاولت اكتم عبرتي يوم فرقاه..
والملم جروح الزمان الطعينه!!
وأعطيه من قلب المعنى معناه..
وأخذ من جروحه ولو هي دفينه!!
واضيع به في زحمة الناس وانساه..
وانسى معه ذكرى السنين وحنينه!!
لقيت نفسي كل ماحل طرياه..
عروق قلبي كلها تقول وينه!!
يأمر على قلبي ولاشك ينهاه..
كلي اناتحت الاشاره رهينه!!
ماكل من يضحك سعيد بدنياه..
وكل من يبكي دموعه حزينه!!
احدن بكى..والكل يدري عن بكاه..
وحدن مع الضحكه تحس بونينه!!
ياشين فرقى الحب وياشين بلواه..
والمشكله دنيا بلاحب شينه!!
والزين مايكمل ولو كان ماحلاه..
إلاحبيبي ماتغير بزينه!!
ماجيت اسولف عن حلاه ومزاياه..
يكفي إحساسي وقلبي عارفينه!!
كن الفضا في غيبته ضاق مسعاه..
وكني غريق ينتظرله سفينه!!
شف دنيتي ياصاحبي عقب فرقاه..
مثل الظلام اللي حصل بالمدينه!!
بكتبه انا في صفحة الشعر واقراه..
وباذبحه بزود الغلا دون سكينه!!
وبارسمه في لوحة الشعر وانعاه..
وبادفنه بين الضلوع الحنينه!!
بوسط الحشا داخل الصدر مشراه..
إما يسار القلب وإلا يمينه!!
الإثنين يناير 04, 2010 6:29 pm
